Ўжо пяць дзяржаў заклікаюць СБ ААН стварыць трыбунал для віноўнікаў катастрофы малайзійскага "Боінга"

14.07.15 17:22 - У свеце

Расея супраць.

Аўстралія, Бельгія і Украіна заклікалі Савет Бяспекі ААН стварыць трыбунал для расследавання катастрофы малазійскі «Боінга» над тэрыторыяй Украіны 17 ліпеня 2014 года.

Пра гэта гаворыцца ў афіцыйных заявах МЗС гэтых краін. Такім чынам, на дадзены момант ужо пяць дзяржаў падтрымалі ідэю, выказаную Малайзіяй. Раней за стварэнне трыбунала выказаліся Нідэрланды.

Міністр замежных спраў Аўстраліі Джулі Бішоп падкрэсліла: «Стварэнне трыбунала прадэманструе, што міжнародная супольнасць не мае намер цярпець дзеянні, якія пагражаюць міру і бяспецы».

З аналагічным заклікам таксама выступілі Украіна і Бельгія. Пяць дзяржаў заклікаюць членаў Савета Бяспекі ААН падтрымаць стварэнне трыбунала для прыцягнення да адказнасці асоб, вінаватых у здзяйсненні найцяжэйшага злачынства.

Расея, як пастаянны член Савета бяспекі з правам вета, раскрытыкавала ініцыятыву стварэння трыбунала ААН. Намеснік міністра замежных спраў Расійскай Федэрацыі Генадзь Гацілаў заявіў, што расцэньвае яе як «несвоечасовую і контрпрадуктыўную».

Як вядома, пасажырскі самалёт «Боінг-777» авіякампаніі Malaysia Airlines, які ляцеў рэйсам MH17 з Амстэрдама ў Куала-Лумпур 17 ліпеня 2014 г., быў, як мяркуецца, збіты ракетай над Данбасам. Загінулі ўсе, хто быў на борце 298 чалавек, дзве траціны з якіх былі падданымі Нідэрландаў.

Каментары