Патрапіць у Крым праз Украіну беларусы не змогуць — дазвол на гэта не даюць

23.06.15 16:54 - Украіна

Калі ж ехаць туды праз Расею, то вярнуцца дадому праз тэрыторыю Украіны магчымасці не будзе, бо памежнікі не прапусцяць.

Атрымаць спецдазвол на наведванне Крыма можна ў любым горадзе Украіны, дзе ёсць структуры Дзяржаўнай міграцыйнай службы гэтай краіны. Але спіс прычын, па якіх гэты дазвол даюць замежнікам, вельмі абмежаваны. Пра гэта Еўрарадыё паведаміў кіраўнік прэс-службы Дзяржаўнай міграцыйнай службы Украіны Сяргей Гунько.

Гунько: “Замежнік па спецдазвол можа звярнуцца ў любое падраздзяленне міграцыйнай службы па месцы знаходжання. Знаходзіцца ён можа дзе заўгодна, таму гаворка ідзе пра ўсю тэрыторыю Украіны. Але ж не можа стаць падставай для выдачы такога дазволу адпачынак. Паездка да блізкіх сваякоў — так, на магілу да блізкага сваяка ці члена сям’і — так, з нагоды смерці блізкага сваяка — так, наяўнасць ўласнасці ў Крыме — так, дыпламатычныя і консульскія функцыі і ўсё”.

Таксама не дапамогуць словы пра блізкіх сяброў, якія запрасілі ў госці, і пра каханую дзяўчыну, што жыве ў Крыме. Тым жа, хто трапляе пад пералік, давядзецца чакаць дазволу на права выехаць у Крым 5 дзён.

Каментары