У Расеі хочуць ўвесці санкцыі супраць Coca-Cola і Pepsi

Ураду Расеі прапануюць увесці санкцыі супраць The Coca-Cola Company і PepsiCo ў дадатак да гадавога працяга прадуктовага эмбарга, зацверджанага указам прэзідэнта ў сераду.

Адпаведны зварот прэм'еру Дзмітрыю Мядзведзеву накіраваў дэпутат Дзярждумы, старшыня Расейскай партыі пенсіянераў за справядлівасць Ігар Зотаў, піша NewsOboz.org са спасылкай на "Известия".

У прыватнасці, член расейскага парламента прапануе забараніць ўвоз прадукцыі Coca-Cola і Pepsi ў краіну, а расейскія заводы кампаній абавязаць працаваць выключна на расейскай сыравіне. Эксперты сцвярджаюць, што ў выпадку ўвядзення такіх мер вызваліцца 40% рынку безалкагольных напояў.

Зотаў аргументуе сваю прапанову тым, што вытворцы газіроўкі спансуюць асноўныя палітычныя сілы ЗША.

"У якасці падтрымкі дзеянняў прэзідэнта РФ і ўрада па контрсанкцыях, прапануем ўвесці абмежаванні на прадукцыю кампаній The Coca-Cola Company і PepsiCo, якія з'яўляюцца афіцыйнымі спонсарамі Рэспубліканскай партыі ЗША і Дэмакратычнай партыі ЗША, актыўна выступаюць за падаўжэнне санкцый у дачыненні да Расейскай Федэрацыі", гаворыцца ў лісце дэпутата кіраўніку ўрада.